Daşkəsən Rayon İcra Hakimiyyətinin başçısı Əhəd Abıyevin Dövlət Yol Polisində çalışan qardaşı oğlu Kamal Abıyev bir sürücünü təhqir edib və onun xanımının xəstəxanaya düşməsinə səbəb olub.

 

BakiPost.azxəbər verir ki, hadisə K.Abıyevin kapitan-inspektor vəzifəsində işlədiyi Göytəpə postunda baş verib.

 

Sürücü Ramin Rzayevin sözlərinə görə, heç bir qayda pozmadığı halda onu postda saxlayıb, sənədlərini istəyiblər: "2016-ci ilin dekabrın 27-də "Niva” markalı 99 ZS 084 dövlət nömrə nişanlı öz şəxsi avtomobillimlə Bakıya gedirdim. Cəlilabad rayonunun Göytəpə postuna çatanda məni saxladılar. Hansı səbəbdən saxlandığımı soruşanda dedilər ki, səni saxlamaq üçün inspektor Kamal Abıyev göstəriş verib.

 

Mənim saxlanılmağım haqda Kamal Abıyevə məlumat verdilər. O da buraxmamağı tapşırdı. Özü 15 dəqiqə sonra gəldi. Niyə saxlanıldığımı ondan da soruşdum. Bildirdi ki, maşınının arxa "prujinləri” balacadır. Mən də izah etdim ki, avtomobilin arxasının yatması, onda hansısa dəyişiklik etməyimlə bağlı deyil, sadəcə yüklü olmasına görədir. Onlara məni boş yerə saxladıqlarını, vaxtımı aldıqlarını bildirdim. Bu iradım isə görünür, Abıyevin bərk xətrinə dəydi və məni aşağılayan ifadələr işlətdi. Mən isə cavabını verdim. Bundan sonra o bərk əsəbiləşdi və məni təhqir etməyə başladı, hətta üstümə də cumdu. Ona maşında ailə olduğunu, səsini aşağı salmağı məsləhət görsəm də, xeyri olmadı. Əksinə, bir qədər də qızışıb, vəzifəli şəxsə yaraşmayan, küçə söyüşləri ilə məni təhqir etdi. Dediklərinə cavablarım isə ağıllı-başlı səs-küyə, gərginliyə səbəb oldu. Sonra polislər məni sakitləşdirdilər, maşınıma doğru gətirdilər. Maşına qayıdanda yoldaşımın özündən getdiyini gördüm, ağzı köpüklənmişdi. Tez su istədim, onu ayıltmağa çalışdıq. Təsəvvür eləyin ki, belə bir vəziyyətdə, K.Abıyev polis maşınında oturub mikrafonla məni söyməyə davam edirdi. Hətta yoldaşımın halının pisləşməsini də qəsdən etdiyimizi deyib, bizi aşağılayan ifadələr işlədirdi.

 

Amma ona fikir vermədən yoldaşımı təcili olaraq Göytəpə xəstəxanasına apardıq. Məlum oldu ki, həyəcandan, qorxudan qıc olub. İkinci dəfə Salyan yolunda halı pisləşdi. Həmin gündən sonra hər gün eyni vəziyyət təkrarlanır. Ona görə də məcbur olub xəstəxanaya yatırdıq, hazırda Sumqayıt xəstəxanasında müalicə olunur. Həkimlərin dediyinə görə, ağır sarsıntı keçirib, qorxub, həyəcanlanıb”.

 

Sürücünün sözlərinə görə, hadisəylə əlaqədar dərhal 102 xidmətinə zəng vurub, sonra da bütün aidiyyəti qurumlara rəsmi müraciət edib: "Bundan sonra Göytəpə postunun rəisi dəfələrlə məni danışığa çağırıb. Amma razılaşmamışam. Niyə hüquqlarım tapdalanmalıdır, ailəmin yanında niyə təhqir olunmalıyam? Hadisə postda olub, orada görüntülər və səs yazıları olmalıdır. Amma onları gizlədirlər. Çünki onlar ortaya çıxsa Abıyev dərhal işdən azad olunmalıdır. Mənə zəng vurub deyirlər ki, guya, texniki qüsur olub deyə görüntülər də, səs də yazılmayıb. Hər şeyi öz xeyirlərinə edirlər, polis adına ləkə olan şəxsi, bir kişini öz qadının yanında təhqir edən ləyaqət hissini, insanlığı itirən şəxsi qorumağa çalışırlar. Bununla bağlı mən Dövlət Yol Polisi baş İdarəsində də oldum. Onlar mənə açıq şəkildə bildirdilər ki, Əhəd Abıyevə görə ona heç nə edə bilmirlər”.

 

Zərərçəkən bildirib ki, maşının avtomobilinin arxa "prujin”lərinin balaca olması ilə bağlı heç bir protokol hazırlanmayıb: "Əgər qanunsuzluq var idisə, niyə protokol yazmadılar?”.

 

Ramin Rzayev vurğulayıb ki, Kamal Abıyevin etdiyi hərəkətlərdən prezident İlham Əliyevə və müvafiq qurumlara müraciət edib.

 

Qeyd edək ki, Kamal Abıyevin vətəndaşlara qarşı kobud rəftarı, qanunsuzluqlar etməsi barədə mətbuatda dəfələrlə məlumatlar yayınlanıb.

 

Sayt haqqında

"Kütləvi informasiya vasitələri haqqında Azərbaycan Respublikasının Qanunu"na əsasən KİV qanunla qadağan olunmuş mənbələr istisna olmaqla, istənilən vəsaitlər hesabına maliyyələşdirilə bilər (Maddə 6-1), KİV üzərində dövlət senzurasına, habelə bu məqsədlə xüsusi dövlət orqanlarının və ya vəzifələrin yaradılmasına və maliyyələşdirilməsinə yol verilmir (Maddə 7), KİV cəmiyyətdəki iqtisadi, siyasi, ictimai və sosial durum haqqında, dövlət orqanlarının, bələdiyyələrin, idarə, müəssisə və təşkilatların, ictimai birliklərin, siyasi partiyaların, vəzifəli şəxslərin fəaliyyəti barədə operativ və doğru-dürüst məlumatlar almaq hüququna malikdirlər (Maddə 8)

ULU YOL xəbər agentliyi 2015
Təsisçi və Baş redaktor:   Saday Fərəcov
Tel:                    +994 70 215 78 15
E mail:                    uluyol.info@mail.ru
Hazırladı: Vüsal Əli

Fatal error: [] operator not supported for strings in /home/uluyol/public_html/index.php on line 300