Elxan Şahinoğlu Çexiyadakı səfirimizi ittiham etdi -Fotolar

 

"Atlas" araşdırmalar mərkəzinin rəhbəri, politoloq Elxan Şahinoğlu Azərbaycanın Çexiyadakı səfiri Fərid Şəfyevin fəaliyyəti barədə yazı qələmə alaraq sosial şəbəkədəki səhifəsində paylaşıb. Yazının başlığı belədir:"Azərbaycanın Çexiyadakı səfiri Fərid Şəfiyev çalışdığı ölkədə məmləkətimizi təmsil edir, yoxsa Rusiyanın maraqlarını qoruyur?"

Politoloqun qeydlərini oxucularımıza çatdırırıq.

***

"Çexiyanın paytaxtı Praqada marşal İvan Konevin heykəli var. Konev II dünya müharibəsində Praqanın alman faşistlərindən azad olunması əməliyyatına rəhbərlik edib. Ancaq həmin Konevin başqa "xidmətləri” də var. Konev birincisi, 1956-cı ildə Macarıstanda xalq inqilabını qanla yatırıb, ikincisi "soyuq müharibənin” simvolu sayılan Berlin divarının tikintisinə rəhbərlik edib və üçüncüsü, 1968-ci ildə Çexoslavakiyanın sovet qoşunları tərəfindən bu dəfə işğalında vacib rol oynayıb. Buna görə də Praqa meriyası qərar verib ki, Konevin heykəlinin üzərindəki "Praqanı alman faşistlərindən azad edib” sözlərinə onun sonrakı "proseslərdə” rolu da əlavə edilsin. Yəni Praqa meriyası Konevi olduğu kimi paytaxt sakinlərinə və turistlərə təqdim etmək istəyir.

Bundan sonra Rusiyanın Çexiyadakı səfirliyi haray-həşir salaraq Praqa meriyasına kəskin məktub göndərib. Rusiya səfirinin imzasıyla yayınlanan məktubda deyilir ki, bəs Konev qəhrəmandır, onun adını ləkələmək düzgün deyil, sovet qoşunları Praqanı azad edib və s. Praqa meriyası bunu inkar etmir. Axı Konevin başqa "xidmətləri” də var, onu da Praqa meriyası vurğulamaq istəyir. Rusiya səfirinin məktubunda Konevin ancaq II dünya müharibəsindəki rolundan danışılır, onun fəaliyyətinin qaranlıq səhifələrinə isə toxunmurlar və üstündən sükutla keçməyə üstünlük verirlər.

Ən maraqlısı bundan sonra başlayır. Deməli, Rusiya səfirinin kəskin ifadələrlə dolu məktubuna 4 səfir - Belarusun, Qazaxıstanın, Ermənistanın və... Azərbaycanın səfiri Fərid Şəfiyev də imza atıb. Birinci üçünü anladıq, Rusiyanın müttəfiqidirlər, həm Avrasiya İttifaqında, həm də Kollektiv Təhlükəsizlik Müqaviləsi Təşkilatında yer alıblar. Bəs biz niyə Rusiyanın üç müttəfiqi və torpaqlarımızı işğal edən qəsbkar dövlətlə bir sırada dayanmalıyıq? Azərbaycanın səfirini Ermənistan səfiri ilə eyni dəyərləri bölüşməyə nə vadar edib? Praqa Meriyasının rus marşal Konevlə bağlı qərarından Azərbaycana nə var? Bunun Azərbaycanın milli və təhlükəsizlik maraqları ilə yaxından və uzaqdan heç bir əlaqəsi yoxdur. Axı elə həmin marşalın ardıcılları Bakıda 20 yanvar qətliamını törədiblər. Həmin marşal 1968-ci ildə çexlərin müstəqillik istəklərini qanına qəltan edib, onun ardıcılı olan digər marşal Dmitri Yazov və digər rus generallar isə 1990-cı ildə Bakını qan gölünə çeviriblər. Azərbaycanın Çexiyadakı səfirinin məntiqindən çıxış etsək gərək əli millətimizin qanına batan Yazovun da "əməllərinə” şübhə etməyək, onu qəhrəman sayaq? Axı Yazov da Konev kimi II dünya müharibəsinin iştirakçısı olub". ///Musavat.com


 

Sayt haqqında

"Kütləvi informasiya vasitələri haqqında Azərbaycan Respublikasının Qanunu"na əsasən KİV qanunla qadağan olunmuş mənbələr istisna olmaqla, istənilən vəsaitlər hesabına maliyyələşdirilə bilər (Maddə 6-1), KİV üzərində dövlət senzurasına, habelə bu məqsədlə xüsusi dövlət orqanlarının və ya vəzifələrin yaradılmasına və maliyyələşdirilməsinə yol verilmir (Maddə 7), KİV cəmiyyətdəki iqtisadi, siyasi, ictimai və sosial durum haqqında, dövlət orqanlarının, bələdiyyələrin, idarə, müəssisə və təşkilatların, ictimai birliklərin, siyasi partiyaların, vəzifəli şəxslərin fəaliyyəti barədə operativ və doğru-dürüst məlumatlar almaq hüququna malikdirlər (Maddə 8)

ULU YOL xəbər agentliyi 2015
Təsisçi və Baş redaktor:   Saday Fərəcov
Tel:                    +994 70 215 78 15
E mail:                    uluyol.info@mail.ru
Hazırladı: Vüsal Əli

Fatal error: [] operator not supported for strings in /home/uluyol/public_html/index.php on line 300